This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
അംബാസമുദ്രം
സര്‍വ്വവിജ്ഞാനകോശം സംരംഭത്തില്‍ നിന്ന്
അംബാസമുദ്രം
തമിഴ്നാട് സംസ്ഥാനത്തെ തിരുനല്‍വേലി ജില്ലയില്‍ ഉള്‍പ്പെട്ട താലൂക്ക്. വിസ്തീര്‍ണം 1280 ച. കി.മീ. മലകള്‍ നിറഞ്ഞു നിമ്നോന്നതമാണ് ഭൂപ്രകൃതി. താമ്രപര്‍ണി നദിയുടെയും മുഖ്യ പോഷകനദിയുടെയും പ്രഭവസ്ഥാനങ്ങള്‍ ഈ മലനിരകളിലാണ്. താഴ്വാരങ്ങള്‍ പൊതുവേ ഫലഭൂയിഷ്ഠങ്ങളായ കൃഷിസ്ഥലങ്ങളാണ്; നെല്ലാണ് മുഖ്യ കൃഷി. മലഞ്ചരിവുകളില്‍ തേയില, ഏലം, സിങ്കോണ എന്നിവയുടെ തോട്ടങ്ങള്‍ ധാരാളമായുണ്ട്. പാപനാശം അണക്കെട്ട് ഈ താലൂക്കിലാണ്; മറ്റു നിരവധി ചെറുകിട ജലസേചനപദ്ധതികളുമുണ്ട്.
താലൂക്കിന്റെ ആസ്ഥാനനഗരമായ അംബാസമുദ്രം ഒരു നെയ്ത്തുകേന്ദ്രമാണ്. ഇതിനടുത്തുള്ള പത്തമടൈ ഗ്രാമം പുല്‍പ്പായ നെയ്ത്തിനു പ്രസിദ്ധിനേടിയിരിക്കുന്നു. കരിങ്കല്‍ത്തൂണുകള്‍ കൊത്തിയെടുക്കുന്നതാണ് മറ്റൊരു വ്യവസായം. ചെന്നൈ-തിരുനല്‍വേലി റെയില്‍പ്പാത അംബാസമുദ്രത്തുകൂടി കടന്നുപോകുന്നു. കന്യാകുമാരി, തിരുനല്‍വേലി എന്നീ ജില്ലകളിലെ മിക്ക കേന്ദ്രങ്ങളുമായും റോഡുമാര്‍ഗം ബന്ധപ്പെട്ടിരിക്കുന്നു.
