This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
ഇബ്‌നു അറബി (1165 - 1240)
സര്‍വ്വവിജ്ഞാനകോശം സംരംഭത്തില്‍ നിന്ന്
ഇബ്‌നു അറബി (1165 - 1240)
Ibn Arabi
ഇസ്‌ലാമിക ദൈവശാസ്‌ത്രജ്ഞന്‍, ദാർശനികന്‍, സാഹിത്യകാരന്‍. ഷെയ്‌ക്ക്‌-അൽ-അക്‌ബർ (ഡോക്‌ടർ മാക്‌സിമസ്‌) എന്ന ബിരുദപ്പേരിൽ അറിയപ്പെട്ടിരുന്ന ഇദ്ദേഹം ഇസ്‌ലാമിക ലോകത്തെ ശ്രഷ്‌ഠരായ ആത്മീയാചാര്യന്മാരിൽ ഒരാളായിരുന്നു. അബൂബക്കർ മുഹമ്മദ്‌ ഇബ്‌നു അലി മുഹ്‌യി അൽദിന്‍ഹതീമി അൽക്വായ്‌ അൽ അന്തലുസ്‌തി ഇബ്‌നുഅൽ അറാബി എന്നാണു പൂർണനാമം. 1165-ൽ സ്‌പെയിനിലായിരുന്നു ജനനം; അവിടെ ഇസ്‌ലാമിക സംസ്‌കാരത്തിന്റെ പ്രധാന ഭൂമികയായ സെവിലിലാണ്‌ വിദ്യാഭ്യാസം നടത്തിയത്‌. പഠനകാലത്തുതന്നെ ഇദ്ദേഹത്തിന്റെ ബുദ്ധിവൈഭവവും ഉള്‍ക്കാഴ്‌ചയും ഇബ്‌നു റൂഷദ്‌ അടക്കമുള്ള മഹാന്മാരെ ആകർഷിച്ചിരുന്നു. സൂഫിസത്തോടുള്ള ആഭിമുഖ്യം ശക്തമാകുന്നതും ഇക്കാലത്താണ്‌.
1198-ൽ കിഴക്കന്‍ ദിക്കിലേക്ക്‌ പോകാന്‍ ദർശനം ഉണ്ടായതിനെത്തുടർന്ന്‌ ഇബ്‌നു അറബി സ്‌പെയിനിനോട്‌ വിടപറഞ്ഞു. മക്കാസന്ദർശനത്തിനിടെ ലഭിച്ച ദൈവിക കല്‌പനയുടെ ഫലമായി ഇദ്ദേഹം രചിച്ച കൃതിയാണ്‌ അൽ-ഫുത്തൂഹാത്ത്‌ അൽ-മക്കിയുഫീ അസ്‌റാള്‍ അൽ-മാലികിയ്യ-വൽ-മുൽക്കിയ. 1201-ൽ രചന ആരംഭിച്ച്‌ 1231-ൽ പൂർത്തിയാക്കിയ ഈ ഗ്രന്ഥത്തിൽ സൂഫിസിദ്ധാന്തങ്ങള്‍ പ്രതിപാദിക്കപ്പെട്ടിരിക്കുന്നു. മക്കയിൽവെച്ച്‌ ഇദ്ദേഹം പരിചയപ്പെടുന്ന അതിസുന്ദരിയായ ഒരു യുവതിയെക്കുറിച്ചുള്ള ഓർമകളാണ്‌ തർജുമാന്‍ അൽ അഷ്‌വാഖ്‌ എന്ന കൃതിയിൽ വിഷയമാകുന്നത്‌. ഇദ്ദേഹത്തിന്റെ മറ്റൊരു കൃതിയാണ്‌ ഫൂസുസ്‌ അൽ-ഹിക്കം വ-കുസൂസ്‌ അൽ-കിലാം. ആദ്യപിതാവായ ആദംനബിമുതൽ അന്ത്യപ്രവാചകനായ മുഹമ്മദുനബി വരെയുള്ള പ്രവാചകപരമ്പരയുടെ പ്രവചനങ്ങള്‍ 27 അധ്യായങ്ങളിലായി ഗ്രന്ഥകാരന്‍ വിശദീകരിക്കുന്നു. സൂഫി സാഹിത്യകാരന്മാരിൽ പ്രമുഖനായ ഇദ്ദേഹം 230-ൽപ്പരം കൃതികളുടെ കർത്താവാണ്‌. കൃതികളിലെ അദ്വൈതപരമായ ചിന്താധാര യാഥാസ്ഥിതിക ഇസ്‌ലാമിക സമൂഹത്തെ പ്രകോപിപ്പിച്ചിരുന്നു. ഇദ്ദേഹത്തിന്റെ അൽ-ഇസ്‌റാഅ്‌ ഇലാമക്കാം അൽ അസ്‌റാഅ്‌ എന്ന ഗ്രന്ഥം പ്രാസപൂർണമായ ഒരു ഗദ്യകൃതിയാണ്‌. മക്കയ്‌ക്കുശേഷം ഈജിപ്‌ത്‌, ബാഗ്‌ദാദ്‌, അറേബ്യ, മോസൂൽ, ഏഷ്യാമൈനർ എന്നിവിടങ്ങളിൽ പര്യടനം നടത്തിയശേഷം ദമാസ്‌കസ്സിൽ സ്ഥിരതാമസമാക്കി. അവിടെവച്ച്‌ പൂർത്തിയാക്കിയ ബീസൽസ്‌ ഒഫ്‌ വിസ്‌ഡം (Bezels of Wisdom).സൂഫി വിശ്വാസങ്ങളും തത്ത്വങ്ങളും അടങ്ങുന്ന ഒരു വിജ്ഞാനകോശമാണ്‌. 1240-ൽ ഇബ്‌നു അറബി അന്തരിച്ചു.
